四年一度的世界盃並不是足球員的專利！為迎接不到一星期就會開鑼的2014巴西世界盃，本澳不同體育項目的10名運動員近日會師氹仔奧林匹克戶外天地的球場，以各自的強項在綠茵球場施展“球技”，勢要在世界盃前夕捲起另一股旋風。趁著10名球星尚在賣關子之際，大家不妨先閱讀他們的資料，為畢日內上演的一場好戲做足準備。
姓名︰陳敏
暱稱︰Jerry
項目︰足球(所屬球會︰蒙地卡羅)
所屬運動強項︰食糊位特別準
如何感受世界盃︰會約朋友一齊睇波，或者同屋企人一齊睇
世界盃支持隊伍︰巴西
支持的原因︰巴西今年的陣容算係唔錯，同埋覺得大家的位置都很平均，隊中特別喜歡的球員係尼馬。
喜愛球星︰尼馬
為何熱愛足球︰足球一場波有成90分鐘，雖然唔係成日入波，但係一入波的時候，所有隊員同埋觀眾都會好興奮，成個場好似會震哂一樣，這種熱情同氣氛會激勵我。
世界盃一定要睇波？︰世界盃係每一位足球員都好想去現場睇的一件事，可以想像吓，一個球埸坐成幾萬人，場面有幾震撼。加上現場的觀眾都好有熱情，所以大家都可以一齊好High咁去睇波，將來有機會一定會親身到現場感受一下氣氛。
姓名︰譚志欣
暱稱︰湯欣(因為好鍾意飲湯)
項目︰游泳
所屬運動強項︰自由式及混合式
如何感受世界盃︰我諗都係比賽同訓練中度過，因為暑假一向較多比賽同集訓，今年又要積極備戰亞運，可能每日都要訓練。不過，世界盃開幕後會到法國同西班牙參加兩站環地中海游泳錦標賽，會順道感受當地世界盃氣氛。
世界盃支持隊伍︰巴西、克羅地亞
支持的原因︰因為巴西是今屆東道主，且陣中有我喜歡的球員尼馬，覺得佢年輕有為、球技了得、樣又ok又有型；克羅地亞就係因應今次劇情需要，本來連克羅地亞會同巴西上演揭幕戰都唔知，現在正好留意吓。
喜愛球星︰尼馬
為何熱愛足球︰好多人鍾意足球，特別係世界盃，如果完全唔識，好似同世界脫節咗。況且專注玩運動的人都很有型，加上足球是有90分鐘的團體賽事，那種堅持及團體精神很值得人敬佩。
世界盃一定要睇波？︰睇技術、睇身材(隨即說了一句︰“唔係喎，睇身材睇周文顥就得啦”)、再睇足球的氣氛，因為足球賽同泳賽觀眾唔同，佢哋會著哂自己隊波衫，甚至有自己所屬博物館，特別是巴西，球賽的氣氛更加熾熱！
姓名︰羅協銘
暱稱︰高手
項目︰籃球(所屬球會︰福建)
所屬運動強項︰突破及快攻
如何感受世界盃︰世界盃四年一屆，真係非常難得，所以會約埋一班朋友出黎睇波，最低限度都約在屋企睇波，感受一下世界盃熱情的氣氛。
世界盃支持隊伍︰德國
支持的原因︰因為入邊有我鍾意的球星奧斯爾，他在德國隊算係一個比較強的球員，而且球隊的中場線都好勁，戰術策劃上特別好睇。
喜愛球星︰奧斯爾
為何熱愛足球︰雖然我係籃球員，但由於讀大學後好多朋友踢波，所以都會約埋一齊或者租場玩吓。接觸足球這個項目後，覺得籃球同足球都相當講求團隊精神，唔可以有單打獨鬥的出現，而且我覺得單打獨鬥並唔適合足球。
世界盃一定要睇波？︰自己平日都有睇波，歐冠決賽時都有約埋朋友一齊睇，更何況現在講嘅係世界盃喎，四年一度的盛事，就算平時無睇開足球的人都會去睇下，我覺得無論點樣都要睇架啦。
姓名︰梁安盈
暱稱︰大隻、男神
項目︰排球(所屬球會︰紅藍)
所屬運動強項︰扣殺、接發球
如何感受世界盃︰會約一班女仔朋友出來一齊睇，之前都覺得足球好悶，從未試睇波，今年撞正高中畢業，大把假放，世界盃又係呢段時間開波，無理由唔睇啦。
世界盃支持隊伍︰巴西、英格蘭
支持的原因︰雖然無睇波，但都聽人講過巴西好勁，都知道朗拿度、朗拿甸奴、卡卡這些名字；英格蘭就劇情需要啦，(無聽過碧咸嗎？)哈哈，梗聽過啦，但之前都唔知佢打英格蘭。
喜愛球星︰卡卡、大衛雷斯
為何熱愛足球︰之前無睇過，所以今屆好有新鮮感。
世界盃一定要睇波？︰四年一屆的盛事一定要見識吓，如果唔係畀人問起都口啞啞。不過，我都知道男仔睇波唔鍾意受女仔玩，佢地會覺得我哋成日問問題好煩，所以我今次都係約一班女仔睇。
姓名︰歐陽嘉豪
暱稱︰歐陽
項目︰田徑(短跑)
所屬運動強項︰短跑400米
如何感受世界盃︰今次世界盃我諗會到朋友屋企一齊睇波，一齊開心吓，嗌吓，希望唔好嘈到隔離啦。
世界盃支持隊伍︰巴西
支持的原因︰巴西係足球大國，這項運動的文化在當地特別濃烈，今屆世界盃正正在巴西舉辦，氣氛肯定不得了。
喜愛球星︰尼馬、朗拿甸奴(睇佢控波簡直係一種藝術)
為何熱愛足球︰當然熱愛啦！足球係一項講求團體合作的運動，雖然田徑都有接力賽，但始終都係一個人跑，唔似得足球可以同時在球場發揮所長，感受那種團隊氣氛。
世界盃一定要睇波？︰一個字，氣氛！有機會一定要到世界盃現埸感受一下！
姓名︰黃梓瀅
暱稱︰小王子
項目︰柔道(52公斤級別)
所屬運動強項︰背負投、體落
如何感受世界盃︰平日較少睇波，但`會在屋企留意，問啲人撐邊隊，八卦吓。如果有時差要三更半夜睇的話就未必會場場追，但點都會睇新聞留意邊隊贏波
世界盃支持隊伍︰日本、意大利
支持的原因︰支持日本係因為大家都係亞洲人，同埋自己本身幾鍾意呢個國家；意大利都成日聽啲球迷講起，知道係實力強國。
喜愛球星︰美斯
為何熱愛足球︰本身冇踢過波，但知道澳門近排興起女子足球，自己本身有玩開柔道同手球，都有諗過試埋足球，應該會在暑假後開始踢吓波。
世界盃一定要睇波？︰大家都關注喎，無理由唔留意的，不過，有個幾得意的情況就係身邊玩柔道的朋友都好少睇波，包括男仔都係，唔知係咪柔道同球類活動比較唔啦更。
姓名︰張俊杰
暱稱︰杰仔、阿GAP
項目︰藤球
所屬運動強項︰二傳
如何感受世界盃︰最衰世界盃都要返工，如果有時間或者放假就會約埋朋友一齊睇。
世界盃支持隊伍︰巴西、比利時、葡萄牙
支持的原因︰比利時係今屆一隊黑馬，因為隊入邊很多球員都去咗大球會“揾食”，而且踢得好有水準，所以我覺得佢地今年絕對有機會跑出；另外也很喜歡葡萄牙的C朗拿度，有睇過關於佢的報道，知道佢每次訓練後都會加操，平時練兩小時就會加多一小時，這種精神很值得學習。
喜愛球星︰夏薩特、卡卡、C朗拿度
為何熱愛足球: 間唔中都會同朋友一齊踢下波，以前都有參加中學的足球興趣班，但覺得投入訓練的話都係唔適合自己，所以現在都係玩“快樂足球”。
世界盃一定要睇波？︰世界盃係四年一屆，而且每一屆都舉辦得好盛大，打開電視或者上網，都會見到距離世界杯還有多少天，而且有好多宣傳，令我更加留意，更加想去睇波。
姓名︰歐陽詠霞
暱稱︰歐霞
項目︰手球(所屬球會︰化地瑪)
所屬運動強項︰遠射、突破
如何感受世界盃︰自己本身都有參與足球訓練，算係女子足球隊的成員之一，今屆世界盃會同一班踢足球的女仔一齊睇波。
世界盃支持隊伍︰阿根廷
支持的原因︰對阿根廷最大認識係美斯，因為男朋友鍾意呢隊，所以都會特別留意。
喜愛球星︰美斯
為何熱愛足球︰足球唔同田徑項目，比賽時只有自己一個在奮戰(接力除外)，而係發揮唔同人的長處，互相協調，睇到靚戰術時真係覺得好精彩
世界盃一定要睇波？︰四年一屆喎，唔睇走寶啦，同朋友傾計都無話題啦！
姓名︰馮偉健
暱稱︰阿健
項目︰體育舞蹈(拉丁舞)
所屬運動強項︰恰恰(Cha Cha)，森巴，牛仔
如何感受世界盃︰得閒就會去睇世界杯，但唔會突登要去簡一場去睇，知道有都會去睇下，通常都會係自己一個人食薯片睇(笑)，因為我都係練完習先得閒睇，所以都係會自己一個睇。
世界盃支持隊伍︰葡萄牙、英格蘭
支持的原因︰因為我以前睇世界杯的時間都係岩岩好睇到這倆對，特別中意的球星有C朗同謝拉特，因為我本身中意皇馬同埋利物浦，所以特別中意佢地入邊利倆個球星。
為何熱愛足球︰因為以前中意在培華的興趣上接觸過足球這個項目，體驗到入邊的團隊精神，同埋合拍性是係重要。
世界盃一定要睇波？︰最主要係感受到他們的氣氛，然後看到球場上每隊國家的球員怎麼為自己的國家曾取出線和曾取冠軍的機會。
姓名︰何冰儀
暱稱︰Ice、阿冰
項目︰劍擊(花劍)
所屬運動強項︰防守同搶攻
如何感受世界盃︰我唔睇波架，下個月要比賽，都係練習，身邊啲frd都會睇，但都係男仔多，自己都會同佢地一齊睇
世界盃支持隊伍︰葡萄牙、日本
支持的原因︰因為葡萄牙有C朗拿度；因為日本球星夠鄰家同靚仔
喜愛球星︰C朗
世界盃一定要睇波？︰國際盛事喎，點都要睇吓，有機會都想到世界盃現場感受吓嗰種勁爆氣氛，哈哈，當然要有機會先啦
