兩連冠的賓菲加在甲組足球聯賽第二輪迎來硬仗，最終藉後備上陣的艾利臣一箭定江山，以1比0擊敗蒙地卡羅錄得兩連勝積6分暫居榜首，蒙卡慘嘗兩連敗。“黑馬”士砵亭在韋達連續兩仗入波下，以2比0擊敗警察，同樣拿下兩連勝。

賓菲加美尼拉斯(左)頭槌攻門

    艾利臣奠勝

    賓菲加對蒙地卡羅一役為今周最有睇頭一戰，兩隊基本上以首仗原班陣容出擊，上半場，賓菲加有兩次極具威脅的埋門，先是美尼拉斯拉應阿蘇傳中，在蒙卡門將何文輝出迎前頭槌攻門，球中柱彈出，接著首戰入四球的費南迪斯門前快射，球貼柱出界，結果兩隊半場互交白卷。

艾利尼(中)助賓菲加全取三分

    失機埋伏線

    換邊後，蒙地卡羅搶回主動，兩次埋門極為到肉，可惜失之交臂，埋下輸波伏線。積遜靚絕的罰球被賓菲加門將尼比亞飛身撲出；但更致命的是65分鐘錯失黃金機會，里斯度右路壓落底線傳中，尼比亞失位，門前無人看管的積遜竟然射出界。大難不死的賓菲加在80分鐘攻入全場唯一入球，艾利臣門前混戰中再冷靜扣過何文輝入波，最終險勝1比0完場。

蒙地卡羅積遜(左)連番失機

    士砵亭破警

    首戰輕取勵馳的士砵亭遇上警察，控制戰局下遲遲未能取得入球，直至完半場前5分鐘，警察門將李東接球甩手，韋臣衝前補一球入網。52分鐘，士砵亭進攻重心韋達再建一功，助球隊淨勝2比0，同樣兩勝有6分的士砵亭得失球不及賓菲加排第二，警察兩連敗包尾。

警察門將送大禮