手機看食物
今周歐聯又再開始新的一季，剛收到的賽果都無咩意外，只係馬體會輸波同車仔打和1:1。不過只係第一場，仲有大把時間，我諗佢地一定有後勁追番上黎。
又有讀者問本人，我推介左幾多食宵夜既地方，但無咩地方係食早餐。我翻查完之後又好似係，想食個平靚正又多選擇既早餐又有咩好地方推介？ 我即時諗起百佳美食店。
百佳美食店
地址: 渡船街與青草街交界(即大興街左轉入渡船街第一個舖位)
營業時間: 6:30 – 19:00
電話: 28346964
咸肉粽. MOP$9
廣東早餐常見食品. 糯米夠煙韌. 食落唔怕散亦唔怕漿住個口. 好食!
燒賣. MOP$5.(5粒)
抵讚既係. 今時今日食碟燒賣都只係5蚊. 仲要粒粒完整實肉. 難得難得!
豬紅粥. MOP$11
粥係比較起米粒個種. 豬紅咬落感覺實在, 唔易散開.
柴魚花生粥. $12.
全碗滿佈柴魚同花生, 滿足晒本人對柴魚花生粥的要求.
炒面/炒河. MOP$9(大)/$8(小)
如果要筆者揀炒面定炒河. 我一定揀炒河先. 因為河粉本身闊同粗身. 炒起黎特別易入味. 呢個合格!
腸粉. MOP$9(大)/$8(小)
腸粉最緊要滑唔好太淋. 呢個做得到!
蘿蔔糕. MOP$6.
呢度既件頭相當大. 蘿蔔絲同糕既比例做得相當出色. 唔怕只係食到糕而只係得幾條蘿蔔絲.
蕃薯糖水. MOP$8
澳門街想買到碗咁多蕃薯既蕃薯糖水仲要有堂食. 真係唔知去邊度搵.
白糖糕/黃糖糕 MOP$6
呢個白糖糕最值得留意既係無一種奇怪的酸味. 本人食過好多都有. 可能呢度新鮮製的. 所以美味可口.
雞絲翅. MOP$8
連雞絲翅都有. 呢度既食品種類真的十分之多. 真係要留比讀者一一去試.
呢間街坊舖有個特色，就係最貴既野都係13蚊，街邊既價錢仲有冷氣既享受，真係好難再搵第二間類似而又有質數既食早餐既地方，各位有時間不妨去試試固中樂趣，今期又講住咁多先，下期再見。
如果大家想同我分享美食，可電郵或到手機看食物的facebook專頁
facebook專頁：在facebook內搜尋 “手機看食物”
by AC(逢星期四刊出)
