今日開始同大家講各組出線熱門隊伍，A組烏拉圭無疑係第一首選，講球員質素，世界盃大賽經驗，都在同組對手之上，入硬16強，烏拉圭冇走雞。

    俄羅斯雖有天時地利人和，但近年國際賽戰績一般，表現停滯不前，球員級數又並非突出，要爭出線有一定難度。

    阿Ben反而睇好埃及，有“非洲美斯”之稱的沙拿個人能力相當強，講入球能力，埃及勝過俄羅斯，絕對有能力將東道主踢出局。至於沙特阿拉伯，由於實力所限，祇有四個字：“努力加油”。

    B組兩牙天下，摩洛哥與伊朗應該未夠班，西班牙同葡萄牙毫無疑問可以攜手出線。

    C組法國一枝獨秀，如果入唔到十六強，的確係法國大餐。至於次名都係揀返歐洲球隊丹麥，只因秘魯出名係地頭蟲，離開自己地頭表現完全兩回事。而變節的澳洲，只望能為亞洲球隊爭一啖氣。