今屆世界盃王者爭霸兩支決賽隊伍終於誕生，由法國對克羅地亞上演終極之戰。至於季軍戰由比利時對英格蘭，睇下兩支失敗者邊隊可以執返個尾彩。

    講返今晨場四強火拼，又係一場精彩刺激比賽，英格蘭雖然又憑住個死球先開紀錄，可惜未能保住勝果，加時下半場更加“臨尾香”，被克羅地亞射手文迪蘇傑一腳攪掂。

    正如所料，克羅地亞贏在中場搶得較多優勢，落後情況下依然穩住陣腳，而數據上亦比英格蘭優勝，能夠殺入決賽都算合情合理。

    克軍決賽將會對住法國，牌面上，法國應該被睇高一隊，加上三場淘汰賽，克羅地亞都踢足120分鐘，變相比法國踢多一場90分鐘比賽，體能確受到極大考驗。但相信克軍一班球員，在最後一戰都會全力以赴拼到最後，即使未能封王，在阿Ben及克羅地亞球迷心目中，已經係冠軍球隊。