“長跑國＂肯亞名不虛傳

講完半馬及迷馬，梗係要報告最挑戰人類身體機能極限的全馬戰況！男子全場成績由肯亞集團包辦前八名，1號號碼布的邁沙以2小時14分45秒首名衝過終點；女子全場冠軍都係肯亞跑手，科美娜腳步浮浮下仍以2小時33分24秒過彩帶。兩位澳門特邀跑手陳頌業與許朗都順利完成比賽，並各自拿下男、女子澳門全馬冠軍。

肯亞三氣袋包辦全馬男子全場冠亞季

陳頌業指過橋挑戰最大

國際馬拉松作為澳門體壇年度壓軸盛事，先唔講“長跑國＂及過江龍有幾勁，不如關心吓本地的“土炮＂跑手先。首次以特邀跑手參賽的陳頌業坦言起步早段因身份壓力而打亂節奏：“可能係第一年跑特邀，想做過靚啲時間，第一段路程確實有少少戰術失當，洗大咗，好彩之後拍住一班領先的女跑手去跑，重新找回節奏，一直保持到速度過終點。＂陳頌業以2小時41分45秒完成全馬，賽後大小腿都有抽筋反應的他表示：“成績比預期差不多，畢竟訓練一般，慢上屆兩分鐘左右，已經滿意。＂今屆賽道有變，陳頌業認為最大挑戰莫過於西灣橋：“今年跑2次來回大橋，相信對所有跑手都非常艱辛。＂

陳頌業昨日挑戰完跑高度，今日再戰長度，坦言好辛苦。

男子全馬澳門得獎者合照

許朗全場第十站領獎台

與陳頌業一樣，許朗今屆再次以特邀跑手參賽，而且賽前一天(周六)又一齊跑完中銀慈善跑樓梯，挑戰完高度，今日緊接挑戰長度，抱恙在身的“女鐵人＂都話有少少攰：“時間尚算OK啦，好彩天氣不太熱，只是過橋比較大風，其他路段都幾好跑，跑得舒服。＂許朗最終以3小時6分50秒衝線，不但奪得澳門第一，更在全場成績排第十，站上領獎台。

睇許朗的表情咁輕鬆，確實跑得幾舒服

許朗(右)在女子全馬全場都有一席位

肯亞第一集團跑快過車

肯亞盛產長跑好手係人都知，但有幾勁真係要見過先可感受到，今屆新路線由運動場起步直出西灣橋去科學館，平時坐車都要起碼十至十五分鐘啦，但記者影完起步後立刻飛奔乘坐大會專車，從友誼大橋(西灣橋封閉)以車速約70公里追趕到目的地科學館，下車只係等咗五分鐘左右，黑夜中已見到第一集團跑到，認真跨張。

男子第一集團早在科學館路段已經成形

兩連冠邁沙：一定再來

結果，“長跑國＂肯亞包辦全場總成績前八位，上屆冠軍邁沙在末段釋放爆發力，轉入運動場後狂奔終點，以2小時14分45秒衝線，同胞甘域治及高池分別慢2秒和3秒完成。連續兩年在澳門“名利收＂的邁沙表示：“我喜歡澳門，下一屆我會再來。＂女子全場冠軍也成為“長跑國＂的戰利品，科美娜跑出2小時33分24秒，快同胞希倫11秒，中國宮麗華慢17秒得第三。