四年前在廣州亞運會奪銅後，型大師姐張佩思話過未知下屆會否出戰，組手大師姐賈嘉慧亦暗示過可能會“掛袍”；不過四年後的今天，二人坦言依然有火，承諾仁川亞運見。

張佩思專心養膝傷

    型(套路)大師姐張佩思上屆已成“三朝元老”，並錄得連續三屆銅牌的佳績；對於半年後的仁川亞運會，是樽頸還是突破？張佩思坦言平常心面對：“運動員狀態總會有高有低，練咗咁多年當然有唔順利時候，但最重要係保持平常心，唔好畀自己咁大壓力，盡量放鬆心情去面對。” 有膝山傷在身的張佩思希望專注亞運會，直言會放棄一些比賽：“其實好想參加亞運會之前的其他賽事，但現階段必須量力而為，唔想傷患加劇，希望養好傷，以最佳狀態迎接亞運會。”

“型”師姐張佩思要求自己不斷進步

賈嘉慧：太多變數

    賈嘉慧即將第三屆出戰亞運會，談到目標，她指出：“空手道比賽太多客觀變數，要睇抽籤、不同重量組別的對手等等，所以能夠爭取咩顏色獎牌，真係好難預計。” 自○五年東亞運起，空手道在各大綜合運動會屢見佳績，作為大師姐的賈嘉慧回顧本澳空手道十年發展，直言後浪仍需努力：“老實講，我覺得仍未接到班，我希望青年隊多啲人參與，盡量減少流失率。”

賈嘉慧決定延續亞運夢

不靠老本自強不息

    今次伊朗隊來澳，賈嘉慧認為獲益不淺：“無論係伊朗隊，定係其他外隊來澳交流，都對澳門運動員有幫助，因為澳門運動員少，互相太熟識打法，練習能夠提升的空間唔大，我哋最缺乏就係變化，加上水平亦都唔高；所以佢哋就可以帶畀我哋唔同的技術和招數，就算打唔出好似佢哋咁高技術，起碼有機會接觸到高水平的實力，鞏固老本，再強化去追趕佢哋。”