講起空手道界大師姐，應該冇人唔識張佩思，連續三屆亞運會女子空手道型銅牌得主，認真威水。不過脫下戰袍回歸生活的Pansy，又有幾多人知道她原來係個“動物癡”？唔止飼養寵物，仲下定決心周遊列國去研究動物，與大自然做朋友，而且想過當保育工作方面的義工等遠大夢想。Pansy話：“我每天最開心、最放鬆的時候，就係對住屋企的仔仔女女。”
天生好動
自小受到父親、本澳乒壇名宿及武術界前輩張忠的薰陶，張佩思早與體壇結下不解緣，而且百足咁多爪：“細個學過好多野，跟爸爸出獅打鼓，好鍾意鼓的節拍，那時候師叔都叫我做小鼓后，大個左對打Band鼓仍有興趣，而且本身的音樂節奏唔錯，細個間中都有參加歌唱比賽，大個鍾意唱K。不過去到十幾歲時，越來越多事情分心，就冇繼續下去。”
表演慾強
張佩思的運動員生涯起點並非空手道，而係師承父親的乒乓球，但為何踏上“型”之路？Pansy坦言都係因為爸爸：“自小見到爸爸玩武術，激發起我好動的一面，之後機緣巧合下參加了空手道班，第一次比賽就拿到冠軍，從認同中獲得更多自信，覺得自己在這方面都OK，就一直練到而家。曾經徘徊在乒球和空手道之間的選擇作出取捨，最終問心都係對空手道型的興趣多些，可能我天生有種潛在的表演慾。”
注動形象
除空手道外，Pansy坦言鍾情時裝設計：“之前讀過一年design，但因為工作和空手道訓練，完全冇時間兼顧下去。”平日最多見張佩思都係穿著黑帶白袍，原來生活中的Pansy非常講究衣著：“就咁睇外型，好多人都話我唔似運動員，但我確實接受唔到自己玩到好大隻，寧願著衫好睇，我是那種要由頭襯到落腳先出得街的人。”
慢熱的人
文武雙全，動靜皆宜，都只係張佩思的其中一面，甚至外表冷漠，都係一種錯覺；Pansy澄清：“唔識我的人，第一次見面都會覺得我好cool，好高傲，但完全錯哂，我只係唔識交際應酬；不過熟落之後，其實我可以玩得好癲，所以正確黎講，我係一個慢熱的人。”
動物狂迷
生活中的張佩思：貪靚慢熱；空手道中的張佩思：嚴謹認真；原來Pansy仲有另一面：動物狂迷。見到Pansy的Whatapps狀態寫上“猿猴科達人”、“動物星球人”等介紹，相信可感受到她對動物的瘋狂程度；在訪問中提到動物話題，Pansy更加進入忘我境界：“首先要交代一下成長環境，我一出世就與貓貓為伴，多到記唔清楚，有自家的，有鄰居的，早己當牠們係家庭一分子。即使試過畀牠們整傷過，甚至咬到要做手術，依然咁鍾意。”
有個夢想
以為Pansy對動物的感情，只不過係普通女孩子鍾愛寵物咁簡單，大錯特錯！Pansy親自剖白：“好多人都只係鍾意養，離不開貓貓狗狗，又或者倉鼠之類的小動物；我都好鍾意，但我鍾意到係想去深入研究佢?，每逢有關哺乳類動物的紀錄片，我都會睇，曾經有個夢想做動物學家，好似《Animal Planet》裡面的人咁，跟蹤和研究動物，同動物零距離相處，甚至生活。”
冒險旅程
哺乳類動物種類成千上萬，Pansy坦言最愛猿猴科，而且一講起即化身“專家”：“唔知你有冇聽過馬達加斯加的環尾狐猴，呢個係我其中一個至愛，打算下年會去的目的地。除此之外，我都好想去秘魯睇草泥馬，去南非、亞馬遜雨林等野生動物集結地，更加係我的終極夢想，我已做好資料搜集，專門有這樣的冒險旅程，甚至跟當地的動物專家一齊去研究，我勁鍾意，希望一年可以去兩次這樣的旅程。”
四戰亞運
可惜，目前所有時間都放在工作和空手道上，Pansy直言現在發“尋找動物之夢”並不現實，只能將計劃放在退役後的時間表內：“如無意外，今屆仁川亞運會應該是自己的最後一屆，掛袍後會去做自己想做的事，因為人生有不同階段。” Pansy家中育有兩隻雪貂，兩隻魔王松鼠，一隻臭鼬鼠，每當提到“仔女”，Pansy都笑到甜絲絲；但作為運動員，經常要出外比賽，很大機會在九月份出發亞運會的“張媽媽”慨嘆：“好彩我同朋友一齊住，有佢照顧佢哋，我好放心，但一定會超級掛住。”
享受過程
動物，不單是Pansy的興趣，而是減壓良方：“空手道為我帶來滿足感和成就感，我非常享受，但某些時候總有壓力；不過在動物世界裡，我完全投入到另一個自己，變得傻傻下，經常會同佢哋傾偈，將一天開心或唔開心的事情都講畀佢哋聽，其實所有動物都好有靈性，我更加享受同佢哋慢慢建立感情的過程。”
難捨難離
訪問中，張佩思透露今年亞運會後將會退役，她坦言依依不捨：“老實講，我真係好鍾意做運動員，所以我會好好享受今屆亞運會，盡力、盡情做到最好。不過我唔會離開空手道界，有時間一定會返去幫助師弟師妹。”
姓名：張佩思
綽號/花名：日本妹，白白
項目：空手道型
身高：1米61
體重：54公斤
生日：8月11日
星座：獅子座
性格：外冷內熱
座右銘：堅持到底
偶像：爸爸
死穴：青蛙、壁虎
目標：亞運再創佳績
職業：客戶服務員
最喜愛食物：日本菜
最喜愛電影：Animal Planet
最喜歡歌曲：好聽的歌
