甲組七人小球傳統勁旅藍白仍未找到勝利方程式，周四晚再次得勢不得分，被青鋒兩記“張君”以0比2敗陣，目前僅一和兩負得一分排A線尾二，爭出線形勢極度渺茫。B線警察兩球殺退發展隊，多打一場較今晚才有比賽的蒙地卡羅多一分，暫時進佔次席。

張君(黃衫4號)成為青鋒贏波功臣

青鋒乘機升次席

    藍白上仗衰收尾被賓菲加絕殺，今仗對青鋒卻輸開局，四分鐘被內援張君閃電破門，一早就落後一粒。之後控制中場的藍白嘗試策動反擊，惜攻勢未夠到肉，半場帶住0比1返更衣室。換邊後，青鋒再次向藍白施壓，完場前十分鐘藉張君射入今場第二球，個人連中兩元，助青鋒鎖定勝局；其實藍白接近補時有破蛋機會，後備上陣的內援魏景星未有好好處理埋門一腳，注定藍白輸0比2。青鋒三戰積六分，升上次席。

藍白用盡方法收復失地

警察兩彈退發仔

    警察遇上兩連敗的發展隊，開波未夠一分鐘已先下手為強，張磊接應石威廉助攻射成1比0。不容再失的發展隊及後連番開弓，甘致豪、羅嘉豪的射門均未能射破對方門將的十指關，而最有威脅的攻門來自何嘉誠頭槌，亦無功而還；反被警察把握到一次突擊機會，張磊後腳妙傳蔡振賢射入，上半場已提早終結比賽，最終維持2比0完場，收穫兩連勝。

張磊(左)替警察閃電開局