歐國盃最後四強經已產生，今明兩日就同大家剖析四強踢法。

意大利在八強戰贏出漂亮一仗，全技術性擊倒世界排名第一的比利時，呢場波可以睇到意大利煞食之處。

防守一向都係“藍軍”强項，所以唔需多講，要講嘅就係佢哋進攻模式已經變得更具殺傷力，特別在由守轉攻，由三閘線經中場，再殺到對方陣地，無論效率與滲透性，都顯示出球員平均質素相當高，而最重要係球隊整體都能夠遵守出賽前部署策略，呢方面相當重要，所以四強之中阿Ben認為意大利最有冠軍相。

西班牙踢法基本模式無太大變化，類似當年黃金一代，即係恩尼斯達與沙維時期。都係以控球在腳為主，不過，現今一代球員質素實在難與當年相比，特別在前線鋒力方面，入球把握能力的確不敢恭維。