賽前被睇高少少的意大利，終於如願可嘗擊敗西班牙，殺到入歐國盃決賽，但過程卻係驚濤駭浪，實際上係贏波輸勢，又係嗰句，西班牙埋門把握好小小，意大利已經“收皮”。踢波的確講對手，意大利今場對住西班牙與對比利時的部署完全唔同，對比利時較為採取主動，對西班牙反而轉打穩守突擊，甚至球員心理上比較拘謹，控傳失誤出現唔少，而一向穩健的防守亦出現唔少漏洞，大難不死，意大利最終靠互射12碼過關，又一次印證足球比賽“七分實力，三分運氣”。