許朗用眼感受世界

沒有聲音的世界究竟係點？相信你同我都唔會真正明白和感受到。不過對於聽障女鐵人許朗來說，她所看到的世界其實跟我們一樣，可能比我們感受到的更加美好，因為她不缺乏愛。自小喜歡旅遊的許朗一有假期就與媽媽周遊列國，她坦言最大的心願是：“趁媽咪身體情況還可以的時候，要同佢去多啲地方玩，最好當然係環遊全世界！”

媽媽鼓勵多元發展

講起許朗，好多人都認識佢係本澳體壇中最勁的女鐵人，也知道佢未夠半歲時因一次生病，過量藥物注射導致聽覺神經受損而永久性聽障的故事。不過許朗的成長經歷未必人人都知，以及如何踏上鐵人之路？原來一切一切都同許媽媽有關：“我細個時身體比較弱，媽咪帶我玩過好多活動，雪屐、打網球、踩單車、打羽毛球、游水等等，媽咪想我多方面發展。後來到我大約七歲左右就加入泳隊，記憶中每年比賽都有獲獎，令我自信心大增，因為游水比賽令我覺得自己就算聽唔到發令槍聲，都唔會輸得太多俾人，一樣有機會入到前三名。”

唔講唔知，原來許朗當初最討厭跑步

由於升中後學業緊張、校方不支持等客觀因素，許朗沒有在游泳方面繼續發展，但許媽媽讓許朗找到另一強項，就係踩單車，也是三項鐵人之路的起點：“十六歲開始接觸公路單車，媽咪搵到人教我踩公路單車，跟住媽咪送咗部二手單車畀我，練左大約兩三個月就開始參加比賽。當年TVB有套劇集係講一個女仔玩三項鐵人的故事，然後媽咪同我講呢項運動好有挑戰性咁喎，結果就心思思想試吓，基本上冇乜練過最討厭的跑步，就膽粗粗參加奧運距離的三項鐵人賽(亞洲盃)，竟然畀我攞到本地女子組冠軍。”

兩男人助踏鐵人路

千里馬必須遇到百樂才可跑得更快更遠！許朗雖有天賦，但當年因畢業後赴京升大學而錯過加入集訓隊，直至06年回澳遇到前鐵人三運總監蘇志偉、以及教練安滕健太，才正式接受系統訓練。自此，許朗翻開人生另一頁，她坦言：“透過長年累月的訓練，令到自己學識對生活持正面的態度，磨練到自己堅毅既意志，增強自己的獨立能力，亦令我變得更加開朗，積極面對人生，比賽中也擴闊咗自己的社交圈子，溝通方面比以前進步唔少，間接在工作上有幫助，我的性格也因此更加開朗，更易和人相處，我唔會覺得聽障對自己有咩障礙。”

許朗經常代表澳門出外比賽，去過好多國家，但她慨嘆沒有時間感受各地的風土人情。

許朗的“鐵人”生活難免犧牲，除返工放工外，就係日練夜練：“連星期六、日都要練習，有時真係覺得好對唔住媽咪，因為之前應承過會同佢去好多地方旅行，但每年都有密集比賽，有時一年加埋都超過廿幾三十場，放棄了好多同媽咪去旅行的好時機。”

享受倆母女自由行

雖然許朗去過好多地方比賽，但她認為所到之處都係過眼雲煙，同媽媽一起去旅行才是享受：“記得十一歲第一次同媽咪兩個人一齊去旅行，孭住個大背囊返大陸周圍自遊行，坐火車會選擇硬座票，唔要軟臥；坐長途車都係坐十幾二十個鐘個啲長途大巴；又唔會住大酒店，留返啲旅費去更多地方，似足真正的背包客。我哋去過內蒙古、雲南、四川、青海、陝西、東北等等，媽咪一直用呢個方法比我廣闊眼界，不斷咁增強左我既適應能力，咁我係多年既自由行中，逐漸磨練到一個比較捱得辛苦既性格啦！”

許朗與媽媽感情深厚

西藏遊印象最深刻

談到印象最深的一次旅行經歷，許朗認為係同媽媽的西藏自由行：“我哋去咗整整一個月。當時仲未開通青藏鐵路，我們從西寧坐十幾個鐘火車到格爾木，係格爾木辦理了入藏紙後，再坐四十多小時的大巴，沿途要克服高山反應，由起點格爾木海拔係2828米，傍晚經過海拔4547米的沱沱河，開始出現高山反應，有點頭痛，第二日去到海拔5231米的唐古拉山口，司機仲特登畀我地落車影相，真係超級興奮，好似完全不受高山反應的影響。過左青藏公路最高點之後，我地都唔駛再擔心高山反應啦！除左拉薩之外，我地兩個人仲去到珠穆朗瑪峰大本營，深入後藏，一路往西去到西藏與尼泊爾的接壤邊境小鎮樟木。這段兩母女獨自到西藏自由行一個月的經歷，是我迄今感到最自豪的一件事情。”

夢想帶媽咪遊世界

許朗坦言最想同媽媽去的夢想國度，非南極莫屬：“我哋去過北極圈，所以希望未來幾年趁媽咪身體情況仲可以的時候，去多d地方玩，最好當然係去哂全世界！我同媽咪去左咁多年旅行，可以話係最佳旅伴，除左出去比賽之外，我都冇同過其他人去旅行。”

許朗新興趣：攝影

去旅行，點可以唔識影相？許朗透露近年喜歡攝影，但笑指仍是入門級：“攝影係一門好高深既藝術，但自己完全冇藝術細胞，唔識畫畫，又唔識做啲手工嘢，織織補補都唔係好掂，唯獨係攝影可能算係比較好少少，但到而家啲攝影作品都唔係好見得人。喜歡影相完全係受媽咪影響，佢學過，好多攝影知識同構圖都係佢教我。”