決賽周分組賽今晚開始踢最後一輪比賽，A組主辦國俄羅斯與烏拉圭雖然要爭頭名，但唔排除兩隊都有留力可能性，預料和波機會相當高。至於沙特阿拉伯對埃及屬於榮譽之戰，埃及實力較為平均，對住防守力弱的沙特，埃及有望攞返個尾彩。

    B組葡萄牙對伊朗展開生死決，雖然葡萄牙和波都可以晉級十六強，但相信球隊會以贏波為目標，從球隊平均人腳、球員個人能力，明顯比起伊朗較為優勝，衹要發揮正常，應可全取三分。不過，伊朗的頑強拼勁絕對不容忽視，上場對西班牙鬥志相當鮮明，防守位置非常到位，只係一球意外波落敗屬非戰之罪，今戰一場定生死，或會帶畀葡萄牙唔少麻煩，預測勝負一球上落。

    西班牙對摩洛哥，“鬥牛勇士”勝算在握，視乎會否爭取更多入球，爭取首名出線。