號外！號外！衛冕世界盃冠軍的德國0:2不敵韓國，在分組賽包尾出局，一班球星可以提早返歸，約埋飲啤酒、食豬手，坐在電視機前睇世界盃。

    其實昨日已經有個老友同我講，今屆畀班強隊搞到雞毛鴨血兼傷亡慘重，問我點解會咁？小弟真係無言以對，唯有死撐講兩個原因，一、證明個波真係圓，二、因為你冇正義感，如果你有正義感的話，就識得鋤強扶弱，唔使搞到血本無歸。收手啦“鬆d”。

    今晚繼續有場生死戰，由塞內加爾對哥倫比亞，塞內加爾衹要和波都可以出線，相信會以穩打穩紮為主，不過睇返對波蘭與日本兩場比賽，防線有好大漏洞，特別去到尾段，集中力與體能都有明顯下降。哥倫比亞要確保出線十六強，就要非勝不可，上場三球輕取波蘭，顯示出強大攻力，占士洛迪古斯、古亞達度及法卡奧狀態十足，今仗一於食“塞”。

    推介：哥倫比亞 2 :0