蛙王是怎樣練成的?

發佈日期:2014/08/15

封面故事第五期.jpg

若數本澳體壇最近紅人,非“蛙王”周文顥莫屬!年僅十八歲、剛剛中學畢業的他在上月底舉行的上海全中運再次證明自己,勇奪兩金兼刷新三項澳門紀錄,最熱血是他以足夠達到世錦賽資格的時間打破全中運200米蛙泳大會紀錄,在全國性運動會留下大名。談到下個目標,周文顥想好似“師姐”兼偶像利安琪一樣,在亞洲賽事取得佳績:“希望在亞錦賽游到一啲成績。”

e49cd7f78a0f6d1feef3fe9d4852d75e.jpg

周文顥在上海全中運大放異彩

究竟“蛙王是怎樣練成的”?咁就追塑到“小蝌蚪”年代。唔好睇周文顥而家大大隻,原來細細個係孱仔一名:“細個身體唔係咁好,所以阿媽帶我去學游水,做吓運動,大概五、六歲開始接觸游泳。”至於點樣踏上“蛙王”之路,周文顥憶述,全因當年在學界賽無意中找到自信:“記得有一年參加D組學界賽,決定唔到報咩項目,就試吓報50米蝶同50米蛙。點知50米蛙的初賽成績竟然同大會紀錄只差一秒,決賽時更加打破學界紀錄,之後一直以蛙式為主項。”

苦練多於天份

天才,想成功也沒有捷徑,後天努力是硬道理;更何況周文顥唔覺得自己係天生“池中物”,所以一直相信苦練比天份更重要:“一個運動員無論係唔係天才,都要經過訓練才會進步,或者得到理想的成績。”因此,練水成為周文顥生活的一部分:“其實冇乜特別,都係聽教練指示去練,平時一日一課,放假有時可能一日兩操,每次大約兩個鐘,一星期練足六日。”

536ddaa3c72ba82e22e219de5e6c70a3.jpg

周文顥認為勤練才是成功之道

儘管訓練再苦,周文顥也沒有埋怨過一句,令他感到最大挫折卻是外界的不理解:“由於學業成績唔係咁好,遠不及游水成績,有時在學校會畀人打擊,話我肯定係掛住游水而唔努力讀書,講真有少少介意,但游水始終係自己最喜歡的,所以唔會理太多,亦都冇想過放棄。”

1c416dd2b4146dd9b890262403339d5a.jpg

雖然周文顥話學業成績一般,但都順利去到畢業旅行。

全中運三破績

周文顥在上海全中運登上巔峰,一次過創造100米自、100米及200米蛙泳的澳門紀錄(相關成績可回顧之前報道),當中強項100米蛙游進1分02秒,200蛙更加以快接近6秒打破舊紀錄,恐佈程度連他自己也不敢相信:“今次真係超乎想像的收穫,我冇預計到自己會游到這個時間,自己都覺得有啲誇張。”對於蛙王之名,周文顥笑笑口講:“其實都冇乜所謂,都係一個稱呼,我覺得只要肯努力,人人都可以做蛙王,頭銜經常會變,只不過今次係我破到紀錄啫,最重要係澳門泳壇一齊進步。”

caf87764378f31ac22aefc67012f2ff7.jpg

一班隊友陪伴周文顥成長

兩教練助上高峰

新一代“蛙王”誕生,昔日“蛙王”曹杰都大讚師弟係本澳泳壇百年難得一遇的奇才。能夠取得今日的“小成就”,周文顥感激兩位恩師:“最初係跟李富嬋教練,她為我打好技術基礎,在她身上學到很多。直至2012年聖誕,開始跟應靜莉教練練習,她讓我更加了解甚麼是比賽,知道怎樣去比賽,戰術和游法等等,各方面都有提升。”

即將出戰下個月仁川亞運會的周文顥坦言:“非常期待亞運,但沒有訂下大目標,只希望保持目前的狀態,游出接近、甚至超越自己的成績,入到決賽當然最好啦!”

1a309b0213b6adaddc52818b6cc9eb35.jpg

應教練助周文顥更上一層樓

閒時最愛打機

泳池以外,周文顥將會迎接大學生涯,報讀澳大新聞系。提到讀書,“蛙王”似乎面有難色,但講到興趣,周文顥搶答最鍾意打機,:“我興趣係同朋友上網組隊打《FIFA》,喺上海全中運返嚟澳門之後的第一晚就玩,哈哈!”

f9a951215b19b6ac833062abc841bff6.jpg

唔單止鍾意打《FIFA》,原來仲係皇馬球迷!

肌肉男想增高

    除了“恐佈地”破紀錄,關於周文顥的話題還有令男性羡慕、女士尖叫的身型,有齊兩大塊胸肌、一排朱古力腹肌和背肌的他自曝:“真係冇刻意去練大隻,冇去特別做GYM,呢啲都係平常游水訓練的成果,純天然練成。”不過周文顥對自己的身材並非完全自信:“唉!最大缺點就係矮。”

d33cfcf51c3917e798d9fb0aebca21de.jpg

周文顥個body真係好令人羡慕

8615fac18ae1b1d2f11f4402f665f17a.jpg

今日平板咗未?

周文顥資料夾

英文名:Terence(冇花名)

身高:174cm

體重:73kg

生日:1996/02/21

星座:雙魚

性格:躊躇

座右銘:Dream Bigger Reach Higher

偶像:北島康介,利安琪,CR7

死穴:游仰泳

目標:變強

職業:學生

最喜歡食物:菠蘿油,薯條