唔經唔覺決賽周已經踢咗56場比賽，大部份戰果都係出人意表，與波友一聚大談波經，幾乎講的都係“陰謀論”。

    講真一句，足球係圓既，難道強隊就冇得輸？其實現今足球要成為一支真正超強勁旅，確要包含好多元素，如果仲要單靠球隊中一兩個超級球星就可以無敵的話，相信C朗與美斯命都唔長。

    又或者好似西班牙與德國一樣，有超強的組織與控制能力，就可以戰無不勝？“阿水”都知，足球比賽最緊要係將個波攻入對方大門。足球始終係整體的競技運動，前中後三線當然要相當平均，而體能更加係重要一環，仲有頑強拼勁，戰意及鬥心，再加上針對性戰術部署，才係真正強隊基本因素。

    卅二強只剩八支球隊留低，到底邊隊能夠成為最終王者？阿Ben真係唔敢講。