早幾年荷蘭曾經跌落低谷，16年世界盃及18年歐國盃都未能殺入決賽週，經過一輪換血之後，近一兩年“橙衣兵團”終於反彈，雖然仍未返到黃金時期，但今屆在歐國盃分組賽，對住三支只屬歐洲二三線對手，如無意外出線在望。

至於次選，我會揀烏克蘭，當然唔係因爲我偶像舒夫真高做教頭原因，事實上烏克蘭不單止踢法以整體機動為主，球員個人技術，亦有一定功架，雖然未去到歐洲列強系列，但計同組對手而言，烏克蘭出線16強同樣問題不大。

奧地利近年在國際賽攞到唔少分，證明足球水平的確進步唔少，可惜遇到較強對手，奧地利始終難以發圍，要與荷蘭及烏克蘭爭一日長短，睇怕未係時候。至於最後一隊北馬其頓，只可用五個字形容“陪太子讀書”。

最後要補充，分組賽六組之中，有四組係第三名成績最佳球隊可以進入16強，奧地利依然有機會搏一搏，單車變摩托。