分析之前，阿Ben唔怕得罪講句，D組四支球隊都冇冠軍相，至於邊隊可以殺出重圍，佔盡主場之利的英格蘭係首選，始終“三獅”最叻打主場，對住“細佬”蘇格蘭應該“食硬”，而克羅地亞與捷克實力已經今非昔比，整體戰力高出少少兼有天時地利人和情況下，英格蘭可以晉級。克羅地亞雖然係18年世界盃亞軍，但之後戰績一落千丈，今時今日仲要靠36歲老將摩特歷為核心，反映出“格仔兵團”青黃不接，幸好捷克與蘇格蘭亦非兵強馬壯，克羅地亞爭取出線機會仍大。捷克最大爭勝本錢，就靠年青力壯，除了守門員華歷克，前鋒比赫特兩名舊將剛過30外，其他戰友都係90後，一於打體力戰。

蘇格蘭叫做有半個主場之利，但對住“大佬”英格蘭，心理上已經先輸一仗，再對两支“克”軍，要攞四分才有機會計數，預料分組賽經已止步。

D組預測出線：英格蘭+，克羅地亞。